Nynorsk kultursentrum har kalla lova historisk tidlegare. Stiftinga har då lagt vekt på at nynorsk, bokmål, samiske språk, norsk teiknspråk og dei nasjonale minoritetsspråka får sterkare vern i lova.

– Lova slår fast at det å følgje lova ikkje held for å nå målet om å fremje nynorsk, som det minst bruka av dei to norske skriftspråka. Dette er avgjerande når kommunar, fylkeskommunar og staten skal vurdere tiltak i til dømes kommunal-, utdannings- og kulturpolitikken, seier direktør i Nynorsk kultursentrum Per Magnus Finnanger Sandsmark, og understrekar at det er synd at Framstegspartiet røystar mot dette.

Nynorskorganisasjonane skulle gjerne sett at lova gjekk meir konkret til verks for å sikre fleire rettar for nynorskbrukarane, og at regjeringspartia hadde fått fleirtal med den raudgrøne opposisjonen for å sikre betre nynorskrettar.

– Hovudlinjene i lova er som vi har føreslått, men vi skulle ønskje lova hadde tydelegare tiltak for nynorskbruk i staten og fylkeskommunane. No må vi sjå på korleis lova blir brukt. Lova dannar eit godt grunnlag for å styrkje språkmangfaldet i dette landet, avsluttar Finnanger Sandsmark.