Kvinnedagen på Vinjesenteret!

Velkomen til markering av kvinnedagen på Vinjesenteret! 

Kl. 16.00. Føredrag av Kathrine Kinn 
Kathrine Kinn (f. 1992) er bonde, sosiolog, forfattar og fast spaltist i Klassekampen. Kinn jobbar til dagleg som fagrådgjevar i Bonde- og Småbrukarlaget samtidig som ho byggjer opp ein nedlagt gard i Telemark. Denne laurdagen kjem ho til Vinjesenteret for å snakke om kvinners rolle i landbruket i dag. 

Kl. 16.30. Kaffi og kake 

Kl. 17.00. Gunnbjørg Vinje 
Då dei i Vinje den 19. mars 1899 skulle røyste over bruken av dei nynorske salmane til Elias Blix i Vinje kyrkje, fekk ikkje kvinnene røyste. Då mennene var ferdig med røystinga, var Vinje Kvenderøysterettslag eit faktum, med Gunnbjørg Vinje som leiar.  

Kampen for nynorsk i kyrkja er ein av mange språkstridar i Noreg som starta lokalt og vart kjempa med demokratiske middel, og er ein interessant parallell til arbeidet for kvinneleg røysterett. Arbeidet Gunnbjørg Vinje og dei andre røysterettskvenda lokalt i Vinje gjorde er ein del av kampen for eit meir demokratisk Noreg. I 2025 er det 100-årsjubileum for Nynorsk salmebok.   

Gunnbjørg Vinje stod også på for å gjeva ut ei lesebok på landsmål. Korleis det gjekk får du vita gjennom filmen Eit gjævt kvende med opptak frå 8. mars-tilstellinga på Vinjar i 2011, laga og framført av bygdefolk frå Vinje. 

Kl. 18.15. Dialektkviss med Vinje mållag 

I resepsjonen på Vinjesenteret vil vandreutstillinga Halldis i livet. Halldis Moren Vesaas 1907-1995 stå oppe heile dagen.  

Kaffi og kake er inkludert i billettprisen.  

Initiativtakarar bak arrangementet er Anne T. Romtveit og Anne A. Ringhus. Arrangementet er eit samarbeid mellom Vinjesenteret, Vinje mållag og Vinje historielag.  

Velkomen!