– Vel så mykje som ein pris til institusjonen, er dette ein pris til folka i Aasentunet. De har gjort mykje meir for skeive og Bygdepride enn kva stillingsinstruksen tilseier, sa nestleiar i Bygdepride, Anbjørn Steinholm Frislid då han på vegner av styret i Bygdepride overrekte prisen.

Bygdeprideprisen vert delt ut til ein eller fleire personar, eller til ein institusjon/organisasjon. Prisen vart delt ut for fyrste gong i 2019, men grunna pandemien er det fyrst no i 2022 at prisen endå ein gong vert delt ut.

I grunngjevinga vert det peika på at Aasentunet har vore med og støtta Bygdepride heilt sidan starten i 2018. Aasentunet/Nynorsk kultursentrum tok sjølve initiativet til å vere med som medspelar. Sidan har Aasentunet vore med på arrangementa kvart einaste år.

– Aasentunet har medverka til å gje Bygdepride breidde og djupne. Aasentunet er med på å gjere det enklare å vere skeiv på Søre Sunnmøre, seier leiar i Bygdepride, Rune Sæbønes.

– Vi er takksame for prisen. For oss har det vore sjølvsagt å inkludere Bygdepride i programmet vårt sidan starten, takka arenaleiar Olav Øyehaug Opsvik.

Rune Sæbønes, Bygdepride