Diktartavla til Paal-Helge Haugen

Paal-Helge Haugen
Paal-Helge Haugen, Foto: Stein Arnold Hevrøy

Haugesenteret og Hardanger folkemuseum heidrar Paal-Helge Haugen med Diktartavla 2021Ein av dei viktigaste lyriske forfattarskapane våre blir del av den flotte Diktarstien i museumstunet på Utne når Haugen får prisen 12. juni.

Gjennom ein lang forfattarskap har Haugen markert seg som ein av dei fremste lyrikarane våre med ein svært rik tekstproduksjon, både i mengd og i breiddFrå debuten i 1965 har diktinga hans vore i kontinuerleg dialog med tekstar frå andre kulturar og andre tider. Haugen har publisert gjendiktingar, skrive tekstar til musikk og til dramatisk framføring, laga dikt til biletkunst og skrive dikt knytt til bibeltekstar. 

 Paal-Helge Haugen står i ei særstilling i det norske lyrikklandskapet, og han har difor ein sjølvskriven plass på Diktarstien, seier Geir S. Netland, arenaleiar ved Haugesenteret. 

Under markeringa, som finn stad på Hardanger folkemuseum på Utne, skal prisvinnaren avduka diktartavla og samtala om diktinga si med forfattar og kritikar Tom Egil Hverven. Det blir også konsert med folkemusikar Kirsten Bråten Berg, som har med seg Daniel Sandén-Warg på hardingfele. 

 Kirsten Bråten Berg er ein av dei meste kjende og framståande kvedarane i Noreg, så dette er noko me verkeleg ser fram til, seier Agnete B. Sivertsen, avdelingsleiar ved Hardanger folkemuseum. 

Diktarstien på Hardanger folkemuseum 
Diktarstien er ein vakker hellegang med 30 diktaravler som prydar det flotte museumstunet ved Hardanger folkemuseum. Haugen går inn i rekkja av markante poetar som har fått Diktartavla, mellom andre Olav H. Hauge, Halldis Moren Vesaas, Jan Erik Vold, Kolbein Falkeid, Eldrid Lunden, Jon Fosse, Cecilie Løveid og Øyvind Rimbereid.

Publikumsundersøking 2023

Nynorsk kultursentrum gjennomfører ei årleg brukarundersøking. Målet er å kartleggje korleis nettstaden blir brukt og opplevd, og å bruke denne informasjonen til å kunne tilby best mogleg digitale tenester.

Opplysningane vi samlar inn, blir berre brukte i samband med denne undersøkinga.

Undersøkinga tek om lag 2–4 minutt å svare på.

Tilbakemeldinga di gjer oss betre