Folkemusikkmessa frå Hardanger: I æva kan ingenting endrast

«I æva kan ingenting endrast» er ei folkemusikkmesse med lyrikk og musikk som omdreiingspunkt. Poet Ruth Lillegraven vil lesa utvalde dikt frå samlinga Sigd (2016). Dikta tek opp trådar frå folketru og gamle forteljingar, men har òg referansar til kristendom med den gjentakande frasa «alt har si tid». 

Rannveig Djønne har komponert all liturgisk musikk til Folkemusikkmessa frå Hardanger som har vore nytta i mest alle kyrkjer i Hardanger og andre stader i landet etter premiera i 2012. Når messa no kjem til Poesifestivalen har Djønne og Lillegraven med seg Marta Lindvik og Elise Østraat på hardingfele og Silje Hveem Lofthus på tverrfløyte. Dei har òg med seg det nye kvinnekoret i Ulvik, Songria, som korsongarar, og folkedansarane Torkjell Lunde Børsheim og Heidi Lund Berg. Liturg er sokneprest Anne Marthe Ulvik. 

Ruth Lillegraven (f.1978) debuterte i 2005 med diktsamlinga Store stygge dikt. Sidan har ho gjeve ut ei rekkje kritikarroste diktsamlingar for vaksne og born, i tillegg til mellom anna romanar, to skodespel for Det Norske Teatret, andre barnebøker og ei gjendikting av den svenske poeten Marie Lundquist. 

Rannveig Djønne er komponist og folkemusikar på toradar, med røtene i tradisjonsmusikken frå Hardanger og Voss. Djønne debuterte med plata Spelferd heim i 2008. Ho har samarbeida med Annlaug Børsheim i snart tjue år, med fleire plateutgjevingar og turnear i inn- og utland. Djønne og Børsheim komponerte i 2019 tingingsverket Husmann, eit musikkteater med utgangspunkt i dikt av Ruth Lillegraven. Djønne og Lillegraven har også samarbeida om framsyninga «Soga om Seselja».

Fri inngang.