Koleruds bøker er prega av språkleg kreativitet og ordleik, med handlingar lagde nær opp til kvardagslivet og ein jordnær røyndom – men med rom for fantasirike innfall.   

I boka Gamle menn i syningom møter ein ungdom i Vassbygda som tek high five når dei møtest, chiller med slush og fluffy cupcakes og flip-flops to go. Men brått vaiar eit dansk flagg over slottet i hovudstaden – og ein fornærma konge sjokkerer ved å gi eit intervju på nynorsk. Bendik Uføre og Enella Frø må reise til hovudstaden for å sjå kva som skjer. Er dette den store sjansen deira til å gjere nynorsken in igjen?   

Etter at Kolerud besøkjer Nynorsk kultursentrum og Haugesenterets poesifestival 3. september, dreg han vidare til Etne bibliotek 4. september, Skeisvang videregående skole 6. september og kommunehuset i Kinsarvik 7. september. Arrangementa i Etne og Kinsarvik blir gjennomførte med støtte frå Vestland fylkeskommune. Fleire bibliotek får besøk seinare på hausten.

– Skulebiblioteket ved Skeisvang videregående skole er eitt av fem utvalde nynorske pilotbibliotek, som vi samarbeider med for å setje meir fokus på nynorsk litteratur og styrkje den nynorske identiteten. Arnfinn Kolerud vil både snakke om boka si og diskutere språket i dag med elevane, seier Tone Slenes, avdelingsleiar for nynorsk skriftkultur i Nynorsk kultursentrum.

«Gamle menn i syningom» kan du kjøpe i nettbutikken vår, handlenett.no.