Diktarens litterære liv
Olav Duun står sentralt i norsk litteraturhistorie. Kunsten han skapte nådde ut til heile verda, og i 1926 mangla han berre éi røyst på å få Nobels litteraturpris.
Han heitte Ole Julius Raabye, men tok med tida namnet Olav Duun etter garden han voks opp på ute på Jøa. Etter lærarskule i Levanger og nokre omflakkande år som lærar slo han og kona Emma seg ned ved Holmestrand i 1908. Her blei han buande til han døydde i 1939, og her skreiv han mest alle sine 31 bøker.
Berre tre av bøkene handlar om fortida. Olav Duun skreiv ei psykologisk samtidshistorie om det å overleve. Den verda og kunsten han her skapte, nådde ut til lesarar verda over: nær 70 omsette bøker på 15 språk. På norsk var bøkene hans prenta i 150 000 eksemplar fram til 1950.
Olav Duun er ein av hovudpersonane i norsk litteraturhistorie. Bøkene var hans originale og sjølvstendige verk, men impulsane kom frå mange kantar. Få av dei forfattarane som var særleg viktige for han, blir lesne av mange i dag.
Utstillinga handlar om kva forfattarar Duun kjende seg i slekt med, og om nokre av dei forfattarane han hadde kontakt med.
Kurator:
Eirik Helleve, Kirsti Langstøyl, Ottar Grepstad
Samarbeidspartnarar:
Aina Griffin (formgiving), JMS Grafisk (produksjon)
Storleik (ferdig montert):
Utstillinga inneheld plansjar i storleik 50 x 50 cm (12 stk) og tittelbanner 70 x 200 cm (2 stk)
Vi låner gjerne ut utstillingar til bibliotek, museum, skular, kulturhus og andre som ønskjer ei utstilling om språk og litteratur.
Sjølve utstillinga er gratis å låne, men de må betale returfrakt. De kan også finne ein ny aktør å sende vidare til så kan vi gjere vidare avtale.
For å tinge utstillinga, send ein e-post til: post@nynorsk.no
