Nynorsk arkivplan på høyring

Kva er «privatarkiv knytt til nynorsk skriftkultur»?
Nynorsk kultursentrum har eit nasjonalt koordineringsansvar for privatarkiv knytt til nynorsk skriftkultur. Det vil ikkje seie alle arkiv som inneheld dokument skrivne på nynorsk, men privatarkiv som dokumenterer verksemd knytt til nynorsk skriftkultur. Dette kan til dømes vere arkiva til eit mållag, bondeheimar eller bedrifter som har nynorsk som ein sentral del av verksemda si. Det kan òg vere arkiv etter personar som har arbeidd for og med dette språket.

– Ein nasjonal bevaringsplan for slike arkiv skal hjelpe oss og andre arkivinstitusjonar med å sikre dokumentasjon av den nynorske historia, seier Irene Hareide, forskings- og samlingsleiar ved Nynorsk kultursentrum.  

Nynorsk kultursentrum skal ikkje sjølve samle inn og ta vare på alle privatarkiv knytt til nynorsk skriftkultur, men vere ein rådgivar for både dei som har laga eller eig arkiv, og dei som skal ta vare på dei for framtida. Nynorsk kultursentrum er difor avhengige av å få til eit godt samarbeid med andre arkivinstitusjonar for å sikre at desse privatarkiva vert tekne hand om.

Nynorsk kultursentrum har i samband med arbeidet med bevaringsplanen gjennomført ei kartlegging av kva for nokre arkiv knytt til nynorsk skriftkultur som allereie er tekne vare på hjå arkivinstitusjonar, museum og bibliotek.

– Gjennom kartlegginga har vi fått informasjon om mange hundre arkiv knytt til nynorsk skriftkultur. Samstundes veit vi at det er mange arkiv som ikkje er fanga opp i kartlegginga. Vi vil derfor presisere at høyringa også er ei moglegheit til å melde inn fleire arkiv, seier spesialrådgivar Stina Aasen Lødemel ved Nynorsk kultursentrum, som har leia arbeidet med planen.

– Når planen er endeleg ferdig, kjem vi til å publisere ei oversikt på nettstaden vår nynorsk.no over bevarte nynorskarkiv, som også vil bli oppdatert fortløpande. Denne oversikta vil kunne vere til god hjelp for folk på leit etter informasjon knytt til nynorsk skriftkultur, fortel Lødemel.

Ein viktig, men sårbar del av historia om Noreg
– Nynorskhistoria er ein svært viktig del av historia om Noreg. Bevaring av privatarkiv knytt til nynorsk skriftkultur er derfor ei nasjonal oppgåve som mange aktørar må samarbeide om, seier Olav Øyehaug Opsvik, direktør ved Nynorsk kultursentrum.

Medan til dømes staten og kommunane er lovpålagde å sikre at arkiva etter dei vert tekne vare på, er det opp til kvar enkelt eigar av eit privatarkiv å sjå til at dette vert teke vare på for ettertida.

– Ivaretakinga av privatarkiv er dermed meir sårbare enn arkiv etter offentlege institusjonar og etatar. Derfor er det særleg viktig for oss i Nynorsk kultursentrum å sikre god ivaretaking av desse nynorskrelaterte privatarkiva for ettertida, avsluttar Opsvik.

Vil ha høyringssvar og innspel innan 10. mars
Nynorsk kultursentrum håpar at andre arkivinstitusjonar, museum, bibliotek, privatpersonar og nynorskorganisasjonar og -institusjonar nyttar høve til å sjå på utkastet til bevaringsplan. Du kan lese utkastet til planen her: Nasjonal bevaringsplan for privatarkiv

Høyringssvar og innspel om privatarkiv knytt til nynorsk skriftkultur kan sendast til post@nynorsk.no innan 10. mars.