Vinnarane av diktkonkurransen er kåra
Haugesenteret takkar for alle diktbidraga som har kome inn til konkurransen i høve Verdas poesidag! Folk frå ulike deler av landet, i alderen 10-68 år, har sendt inn sine dikt. Det gjev oss god tru på diktet si framtid!
Framtid og håp var også tema for denne diktkonkurransen, og fleire av dikta som kom inn syner oss at poesien har kraft til å gje stemme til håpet og framtida, og til å fanga det som ligg mellom draum og røynd.
Ein jury frå Nynorsk kultursentrum og Haugesenteret har kåra tre vinnarar i kvar sin kategori. Juryen er imponert over dikta, og håpar vinnarane vil halda fram med å skriva fleire dikt også i framtida. Ein premie til inspirasjon for vidare skriving er på veg i posten. Gratulerer!
Vinnar kategori born:
Mørke dagar
Kvifor skal vi pakke ned livet i ein koffert, dra vekk og gløyme?
Kvifor rømme og ikkje snakke?
Kvifor frykte når ein kan sei imot?
Kvifor springe når ein kan redde?
Kvifor krangle når me alle er i
ei boble som vert tynnare for kvar dag .
Vilja Lekve Halvorsen,
12 år, frå Ulvik
Vinnar kategori ungdom:
Håp
Kva er dette ordet?
Er det noko me er fødd med,
ei kjensle som gir oss fred?
Kan me sei det er lengsel,
ein draum om noko betre.
Håp, moglegheita for noko nytt.
Syna ditt liv og lytt,
lytt på mine enkle ord.
Alle stadar på denne jord.
Rundt deg kan du sjå
håp!
Anna Vevle
17 år, frå Voss
Vinnar kategori vaksen:
Arbeidsplan for 7a
Dotter mi
skal lage
insekthotell
lære om
urfolket
i Canada
utforske
mat og klede
i Islam
spele trommer
til «Yellow Submarine»
svømme butterfly
bøye substantiv
ho er
eit håp, håpet
ei framtid, framtida.
Helen Daae Frøyseth
46 år, frå Uggdal
